ޓެކްސްގެ ޑެޕިއުޓީ ކޮމިޝަނަރު އައްޔަންކުރަން 3 ނަމެއް މަޖިލީހަށް

ހުނައިދާ ޔާސިރު

05 އޮކްޓޫބަރ 2026 - 12:53

0 comments

ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ބޭފުޅަކު އައްޔަންކުރެއްވުމަށްޓަކައި، ރައީސް ޑރ. މުހައްމަދު މުއިއްޒު ތިން ބޭފުޅެއްގެ ނަން ރައްޔިތުންގެ މަޖިލިހަށް ފޮނުއްވައިފި އެވެ.

ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲ އަށް ރައީސް ފޮނުއްވި ސިޓީފުޅުގައި ވިދާޅުވެފައިވަނީ، ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމު ހުސްވެފައިވާތީ، ޓެކްސް ނެގުމާ ބެހޭ އިދާރީ ޤާނޫނުގެ ދަށުން އެ މަޤާމަށް ކުރިމަތިލުމަށް އިޢުލާންކުރުމުން އިޖާބަދެއްވި ބޭފުޅުންގެ ތެރެއިން ތިން ބޭފުޅެއްގެ ނަން މަޖިލީހުގެ ރުހުން ހޯދުމަށް ފޮނުއްވާފައިވާ ކަމަށެވެ.

މަޖިލީހަށް ފޮނުއްވި ނަންތައް:

1. އަލްފާޟިލް އަޙްމަދު ޝަފްނީޒް، ބަގީޗާގެ / ސ. ހުޅުދޫ
2. އަލްފާޟިލް އަޙްމަދު މައުސޫމް، ވ. މިޔަރެސް
3. އަލްފާޟިލާ މަރިޔަމް ޖައިދާ، ކަނދުގަސްދޮށުގެ / ކ. ދިއްފުށި

ރައީސްގެ ސިޓީފުޅުގައި ވަނީ މި ނަންފުޅުތައް ރައްޔިތުންގެ މަޖިލީހަށް ހުށަހަޅުއްވައި، މަޖިލީހަށް ފެނިވަޑައިގަންނަވާ ގޮތެއްގެ މަތީން ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކުރާނެ ބޭފުޅެއްގެ ނަން ފާސްކޮށްދެއްވުމަށް އެދިވަޑައިގެންފައެވެ. މި ސިޓީފުޅު ރައްޔިތުންގެ މަޖިލީހުގެ މިއަދުގެ ޖަލްސާގައި އަމީން ޢާއްމު ވަނީ އިއްވަވާދެއްވާފައެވެ.

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމު ހުސްވެފައިވަނީ، ކުރިން އެ މަޤާމުގައި ހުންނެވި ފާޠިމަތު އަމީޒާ، ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ޢައްޔަންކުރެއްވުމާ ގުޅިގެންނެވެ.