ޗައިނާ ސަފީރު ރައީސް އަރިހަށް ވަދާއީ ޒިޔާރަތްކުރައްވައިފި

އިސްމާއިލް ރިޒާ

03 ޑިސެމްބަރ 2024 - 14:33

0 comments

ޗައިނާ ސަފީރު ވަންގް ލިޒިން، ރައީސް ޑރ. މުހައްމަދު މުއިއްޒުގެ އަރިހަށް ވަދާއީ ޒިޔާރަތް ކުރައްވައިފި އެވެ.

ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިންގެ ތިން އަހަރުގެ ދައުރު މިހާރު ވަނީ ހަމަވެފަ އެވެ.

ރައީސް އޮފީހުން ބުނީ ސަފީރު ވަންގް ލިޒިން އަނބުރާ ޗައިނާއަށް ވަޑައިގަތުމުގެ ކުރިން ރައީސްގެ އަރިހަށް އިހުތިރާމުގެ ޒިޔާރަތެއް މިއަދު ކުރައްވާފައިވާ ކަމަށެވެ.

ރައީސް އޮފީހުން ބުނީ މި ބައްދަލުވުމުގައި، ޗައިނާގެ އެހީތެރިކަމާއެކު ރާއްޖޭގައި ހިންގަމުންދާ މަޝްރޫއުތަކާއި އަދި ކުރިއަށް ރާވާފައި ހުރި މަޝްރޫއުތަކާ ގުޅޭ ގޮތުން ވެސް މަޝްވަރާ ކުރައްވާފައިވާ ކަމަށެވެ. ބައްދަލުވުމުން ނިންމާލާފައި ވަނީ، ދެ ގައުމުގެ ދެމެދުގައި އޮތް ގުޅުން ދަމަހައްޓަވާނެ ކަމުގެ ޔަގީންކަން ރައީސް ދެއްވުމަށްފަހުގައި ކަމަށް ވެސް ރައީސް އޮފީހުން ބުންޏެވެ.

އެކަމަނާ އިއްޔެ ވަނީ ނައިބް ރައީސް ހުސެއިން މުހައްމަދު ލަތީފްގެ އަރިހަށް ވެސް ވަދާއީ ޒިޔާރަތެއް ކުރައްވާފަ އެވެ.

ޗައިނާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަގާމަށް ވަންގް އައްޔަނު ކުރައްވާފައި ވަނީ ސެޕްޓެމްބަރު 6، 2021 ގަ އެވެ.