އެކްސިޑެންޓުގައި އަނިޔާވި ކުއްޖާ އައިޖީއެމްއެޗަށް ބަދަލުކޮށް ވެންޓިލޭޓަރުގައި ފަރުވާދެނީ

އިސްމާއިލް ރިޒާ

30 އޯގަސްޓް 2026 - 12:11

0 comments

ހުޅުމާލެ ދެވަނަ ފިޔަވަހީގެ ވިނަރެސް ފްލެޓުތައް ކައިރީގައި ރޭ ހިނގި ނުރައްކާތެރި އެކްސިޑެންޓުގައި އަނިޔާވި އަންހެން ކުއްޖާގެ ހާލު ސީރިއަސްވެ، އައިޖީއެމްއެޗްގެ އައިސީޔޫގައި ވެންޓިލޭޓަރުގެ އެހީގައި ފަރުވާދެމުން އަންނަކަމަށް އެ ހޮސްޕިޓަލުން ބުނެފި އެެވެ.

ނަމަވެސް ކުއްޖާގެ ހާލަތާ ބެހޭ މައުލޫމާތެއް ހިއްސާއެއް ނުކުރި އެވެ. އެނގިފައިވާ ގޮތުގައި، އެ ކުއްޖާގެ ހާލު ވަރަށް ސީރިއަސް އެވެ.

ފުލުހުން ރޭ ބުނީ މި އެކްސިޑެންޓް ހިނގާފައި ވަނީ ހިތިގަސްމަގުން ދުއްވާފައި ދިޔަ ސައިކަލެއް، ވިނަރެސް ހަތެއްގެ ކައިރީގައި މަޑުކޮށްފައި އޮތް ކާރަކަށް އަރަން މަގާވީ ފަޅިން ހިނގާފައި ދިޔަ މީހެއްގެ ގައިގައި ޖެހިގެން ކަމަށެވެ.

މި އެކްސިޑެންޓުގައި ހާލު ސީރިއަސް ވެފައި ވަނީ ސައިކަލު ފަހަތުގައި އިން ނުވަ އަހަރުގެ އަންހެން ކުއްޖަކަށެވެ. އެކުއްޖާގެ ބޯ ފަޅައިގެން ގޮސް، ވަރަށް ބައިވަރު ލޭ ވަނީ ފައިބައިފަ އެވެ.